Ephesi 2:10 : Thil tha ti atan krista Isuaah chuan siama awmin , ama kutchhuak kan ni si a, chu thil tha tih chu kan awmna turin Pathianin a buatsaih lawk a ni.
Zorama cheng zofate zingah ringtu inti lo kan awm awm lo ve, Isua Krista ringtu inti kan ni theuh awm e, amaherawhchu, kan ram dinhmun han thlir hian lung chu a awi zan lo deuh thin a ni. Hei hian khawtlang, chhungkua leh Kohhran a huam vek a ni. Pathianthu tha tak tak kan sawi a, kan ngaithla a, kan duh tawk emaw tih mai tur a ni fo thin.
Eng thil nge Lalpan ti tura min duh tih lam hi kan ngaihtuah a, chumi ti tura kan pen chhuah a tul tak zet a ni. Thil tha ti atana a buatsaih lawkte kan nih angin chu thil tha chu ti turin ke i pen ang u. Chu chu kan tih tur leh kan damchhan chu a ni. Ringtute kan chak loh chhan leh kan chauh thinna chhan ber mai chu he thil tha tih hi kan hlamchhiah thin vang a ni. Ringtute (Kohhranho) min tibuai fo thintu chu Pathian thu kan awih lohna hi a ni. Pathian chuan amite a enkawl thin a, an thatna turin hna a thawk bawk thin. Nitina kan nunah Pathian thu awih zel thin i la, keimahni lam indah bo zelin, ama thu ngaichang zel ila, thil har leh ulh tak takte ti turin min kan Pathian hian min beisei lo. Kan theihtawk erawh min phut a ni. Keimahnia Pathu lo lang/thleng thin hi mahni inpaihthla zelin, "Lalpa, i thu ang zelin thleng rawh se, Amen" tiin i chhang thin ang u. A thu keimahniah a lal takzet chuan Lalpan ropuina a chang thin. Kan nunah Lal Isua dah pawimawh berin, a hman atan i inpe ve ang u, Lalpa tana inphal/inpete nunah pathianin ropuina a chang thin si a. Intih Thlaraumi lam a ni lo ve, Lalpa tana nun a ni zawk. Chan san lam pawh a ni lo, Lalpa tana thil tha tih hi a ni zawk. kan tihtheih bahah hian a ni Lalpa a chet thin, thu mai maite nunah Lalpa a inpuang ngai lo. Unau duhtak, tho la, i puan ven sawichhing la, Lalpa tana nunga, a tana thil tha ti ve turin in buatsaih rawh, chu thil tha tih chu Lalpan i tan leh ka tan a buatsaih lawk a ni...Lalpa chu fakin awm rawh se.... Amen.!!!
No comments:
Post a Comment